Magplano para sa iyong mga hayop

Ang iyong mga hayop ay iyong responsibilidad. Kailangang isali mo sila sa iyong pang-emerhensyang pagpaplano at paghahanda.

• Mag-imbak ng sapat na pagkain, tubig at mga suplay para sa iyong mga hayop para sa tatlong araw o mahigit pa. Tandaang ang mga hayop kadalasan ay iinom ng mas maraming tubig kaysa karaniwan kapag nai-stress.
• Tiyaking pinalagyan mo ng microchip ang iyong mga alagang hayop. Irehistro sila sa iyong beterinaryo at sa New Zealand Companion Animal Register (NZCAR). Panatilihing napapanahon ang mga detalye na ito at isama ang mga detalye para sa isang kontak na nasa labas ng inyong rehiyon.
• Repasuhin ang iyong polisiya ng seguro para sa alagang hayop upang malaman kung sumasaklaw ito sa mga emerhensya.
• Kung kailangan mong lumikas, isama mo ang iyong mga alaga at umaalalay na hayop. Kung hindi ito ligtas para sa iyo, hindi rin ito ligtas para sa kanila. Tiyaking ang lugar na paglilikasan mo ay tatangapin ang iyong mga alagang hayop. O magkaroon ng mga detalye ng kontak para sa mga kennel, cattery, at mga motel na tumatanggap ng alagang hayop.

Ang mga hayop na umaalalay

Ang mga hayop na umaalalay ay sinanay at sertipikado ng isang organisasyon. Nagbibigay sila ng mahahalagang serbisyo tulad ng pagbibigay-babala o suporta. Pinahihintulutan silang pumasok sa anumang pampublikong lugar alinsunod sa batas. Maaaring kailanganin mo ng pahintulot upang makapasok sa isang marae o isang simbahan.

Ayon sa batas, hindi ka maaaring ihiwalay sa iyong asong umaalalay o gumagabay. Kabilang dito ang mga lugar na nagbibigay ng suporta sa oras ng emerhensiya, tulad ng mga Civil Defence Centre.

Ang organisasyong nagsertipika sa iyong aso ay magbibigay dito ng isusuot na coat na may pangalan ng organisasyon at ilang uri ng pagkakakilanlan para sa iyo. Makakatulong ito upang mabilis kayong muling magsama ng iyong aso kung sakaling kayo ay magkahiwalay.

• Siguraduhing suot ng iyong hayop ang kanyang coat o pagkakakilanlan hangga't maaari. Hindi mo kailangan ng pagkakakilanlan upang makakuha ng suporta o makapasok sa isang Civil Defence Centre.
• Siguraduhing dala mo ang iyong assistance animal identification card at, kung maaari, isang pangalawang uri ng pagkakakilanlan tulad ng sulat mula sa iyong organisasyon.
• Tanungin ang iyong organisasyong nagsertipika kung paano sila kokontakin pagkatapos ng emerhensiya at kung anong suporta ang kanilang ibinibigay.
• Siguraduhing mayroon kang kasalukuyang larawan mo at ng iyong hayop sakaling kayo ay magkahiwalay.