Alamin ang mga suplay na kailangan ninyo
Sa isang emerhensya, ikaw ay maaaring ma-istak sa bahay nang tatlong araw o mahigit pa. Alamin kung anong mga suplay ang iyong kailangan at magplano upang makaraos.
Sa pahinang ito
Ang kailangan mo sa isang emerhensya | What you will need in an emergency
Ang Ministry for Ethnic Communities at ang National Emergency Management Agency ay nagtulungan upang lumikha ng seryeng ito ng mga video, para alam ng komunidad ang dapat gawin upang maghanda para sa iba't ibang mga sakuna at emerhensya, at paano tutugon kung mangyari ang mga ito.
Ipapaliwanag sa video na ito ang kailangan mo sa isang emerhensya.
Sa bahay
Malamang na mayroon ka na ng karamihan sa mga bagay na kailangan mo. Hindi mo kailangang ilagay sila sa isang lugar, ngunit maaaring kailanganing hanapin mo ang mga ito nang madalian at/o sa dilim.
- Tubig para sa tatlong araw o mahigit pa — tiyaking mayroon kang siyam na litro man lamang na tubig kada tao. Ito ay magiging sapat para inumin at sa batayang kalinisan.
- Mga pagkaing pangmatagalan na hindi na kailangang lutuin (maliban kung mayroon kang camping stove o gas barbecue) at pagkain para sa mga sanggol at mga hayop.
- Mga toilet paper at malalaking plastik na timba para pang-emerhensyang kubeta.
- Mga pantrabahong guwantes at wasto ang pagkakaakma na mga P2 o N95 mask.
Kung mayroon kang mga pangangailangang pang-diyeta o paggamot, tiyaking may sapat kang pagkain, kagamitan, o gamot na tatagal ng tatlong araw sa bahay. Gayundin sa isang grab bag kung maaari. Kung kailangan mong lumikas, maaaring walang pagkain at mga suplay na kailangan mo ang mga emergency shelter.
Maaaring maapektuhan ng pagkawala ng kuryente ang mga EFTPOS at ATM machine, kaya magandang ideya na magkaroon ng pera sa bahay. Pinakamainam ang coins (bagol) at maliliit na halagang perang papel.
Huwag kalimutan na ikaw at ang iyong mga kapitbahay ay maaari ring magtulungan sa pamamagitan ng pagsasaluhan ng mga suplay.
Sa pangangalaga sa iyong sarili at sa iyong sambahayan, tinutulungan mo rin ang mga serbisyong pang-emerhensya na magtutok ng kanilang mga limitadong mapagkukunan sa mga taong nangangailangan ng pinakamalaking tulong.
-
Sa isang emerhensya, maaaring ikaw ay walang tubig. Maaaring maputol ang suplay ng tubig, o maaaring masira ang mga daanan ng tubig at imburnal. Maaaring kailangan mong gumamit ng pansamantalang mga kubetang pang-emerhensya.
Upang gumawa ng kubetang pang-emerhensya, gumamit ng mga sisidlang matibay, walang butas at maaaring malagyan ng humigit-kumulang 15 – 20 litro. Halimbawa, isang basurahan o walang lamang lata ng pintura. Ang iyong sisdlan ay kailangang may hustung-hustong takip.
Kung maliit ang sisidlan, magkaroon ng malaking sisdlan na may hustung-hustong takip para tapunan ng dumi.
- Lagyan ng plastik bag sa loob ang mga timba (kung maaari).
- Magbuhos o magwisik ng kaunting regular na pandisimpekta sa bahay (gaya ng chlorine bleach) sa sisidlan tuwing may gagamit ng kubeta. Babawasan nito ang amoy at mga mikrobyo. Kung wala kang pandisimpekta, maaari kang gumamit ng lupa at mga tuyong materyales.
- Takpang muli tuwing matapos gamitin.
- Matapos gamitin ang kubeta, hugasan nang mabuti ang iyong mga kamay gamit ang sabon at tubig, o gumamit ng hand sanitiser.
- Kapag napuno na ang iyong kubeta, itapon ang dumi ayon sa payo ng pampublikong kalusugan.
Ang mga suplay ng tubig, kabilang ang iinuming tubig, ay maaaring maapektuhan sa isang emerhensya. Mag-imbak ng suplay ng tubig para sa tatlong araw o mahigit pa. Alamin ang higit pa tungkol sa pag-iimbak ng tubig.
Sa isang grab bag
Ihanda ang mga grab bag para sa lahat sa iyong pamilya. Bawat bag ay dapat mayroong:
- Panlakad na mga sapatos, makakapal na damit, kapote at sumbrero
- Tubig at mga meryenda (huwag ding kalimutan ang mga sanggol at mga hayop)
- Hand sanitiser
- Portable na phone charger
- Pera (coins at maliliit na halagang perang papel)
- Mga kopya ng mahalagang mga dokumento at ID na may larawan
Huwag kalimutan ang anumang mga gamot na maaaring kailanganin mo at itabi ang iyong first aid kit, flashlight, radyo at mga baterya, at iba pang mahahalagang suplay sa isang lugar kung saan madali mong makukuha ang mga ito kung nagmamadali.
Kung mayroon kang mga pangangailangang pang-diyeta o paggamot, tiyaking ilagay din sa iyong grab bag ang pagkain, kagamitan, o mga gamot na kailangan mo kung maaari. O sa isang lugar kung saan mabilis mong makukuha ang mga ito kung hindi mo nagawa.
Sa iyong kotse
Magplano ng iyong gagawin nang maaga kung ikaw ay nasa iyong kotse kapag nangyari ang emerhensya. Ang baha, snow storm o malaking aksidente sa trapiko ay maaaring makapag-stranded sa iyo sa iyong sasakyan nang ilang oras.
Magtabi ng mahalagang mga bagay na pang-ligtas sa emerhensya sa iyong kotse. Kung ikaw ay nagmamaneho sa sukdulang mga kondisyon ng taglamig (winter), idagdag ang:
- isang brush
- isang pala
- mga kadena para sa gulong
- pangkayod ng windshield, at
- makakapal na damit.
Maglagay sa iyong kotse ng isang pares ng panlakad na sapatos, isang waterproof jacket, kailangang-kailangang mga gamot, kakaning tsitsirya, tubig, kable ng phone charger at flashlight.
Manatiling up to date sa impormasyon tungkol sa panahon at daan kapag nagpaplanong magbiyahe.
Magplano ng iyong daraanan gamit ang impormasyon sa live na trapiko at paglalakbay sa website ng Waka Kotahi.
Sa trabaho
Tiyaking mayroon kang mga suplay sa trabaho kabilang ang matibay na panlakad na sapatos, waterproof jacket, flashlight, kakaning tsitsirya at tubig. Makipag-ugnayan sa mga nakatira sa kaparehong lugar at maaari kayong magtulungan upang magkasamang makauwi sa oras ng isang emerhensya.
Alamin kung paano ihahanda ang iyong trabaho
Ihanda ang iyong sambahayan
Nasa sa iyo upang tiyaking alam ng iyong pamilya (whānau) at ng mga taong iyong minamahal kung ano ang gagawin.
